24/12/2012

A nosa Dorna vai vento en popa!

Vento en popa e con nordestada! Voa o mar e á xeiteira de Lajareu non hai quen a colla. Nen a Domingos que bota táboas, cadernas e paus a mais ritmo do que se tarda en colgalo en internet. Tamén hai que dicir que él é un profesional e traballa a tempo completo e nos andámosvos nésto cando nos cadra. De feito estas fotos xa case teñen un mes, así que, se non apuramos, a próxima vez que vaiamos, xa o collemos veleando a Dorna entre Sagres e Vionta. Mirade que cousa chula! Hai que ir ás Illas Feroe para ver unha disposición de táboas como esta. Así navegan logo as Dornas! E outra novidade: A Dorna xa ten nome! Alomemos nos papéis. O día ese que fixemos estas fotos Domingos. Asaltounos con que lle había que dar xa o nome. Que ao outro día lle viña o enxeñeiro e tíñamosllo que dar xa. Así que nos constituimos e gabinete de emerxencia con Domingos de asesor experto independente e veña a dicir alí nomes. Evidentemente tiña que ser en galego, feminino, e recoller un topónimo mariño da nosa Ría. Preferentemente nunha soa verba, e, podendo ser, un nome dalgunha dorna antiga, que tamen o patrimonio inmaterial recuperamos os de Lajareu. Quedoulle Insuabela, aprobado pola directiva co dictame favorable do asesor independente... Espero que vos guste....













19/11/2012

XA ESTÁ POSTA A QUILLA DA NOSA DORNA XEITEIRA


Aquí está, preciosa, potente e delicada a un tempo, longa, esbelta airosa, clara, perfecta, a quilla da nosa dorna xeiteira, coa sua roda e pinchón, a voltura (taboas de par da quilla) e o barragán presentado no seu encaixe a punto de se afinar e clavar. Por fin! Non sabedes qué alegría nos da vela, logo de tantos anos de ansia. E ahí a tedes nacendo coma da nada no medio das virutas, os recortes e as ferramentas artesanais da carpinteiría de Domingos.
 
Asistir ao nacemento dunha dorna, sobre todo dunha grande, no obradoiro de Domingos, e para nos como presenciar o milagre da vida. Alí non hay maquinarias, nin grúas nen grandes equipamentos. Nada mais que  un banco vello de carpinteiro; un cepillo eléctrico, unha circular pequena, dous traladros e as ferramentas artesanais de carpinteiro de riveira do pai e do avó, permanecendo sinxelas e nobles a través do tempo, afinadas e afiadas ate a perfección. E dese chan sinxelo, coberto de serrín e virutas, vai nacendo, a partir da quilla de carballo, táboa a táboa de piñeiro limpo e branco, a máis fermosa obra de arte que ún de nos poda contemplar: perfecta nas sua formas, idonea ao seu uso, producto de séculos de evolución, depositaria dun saber e dunha técnica transmitida de pais a fillos e que agora xurde tan natural das mans de Domingos

Preguntarédesvos algúns cómo é que, na actual situación, os do Lajareu damos avante a unha empresa como esta... Pois non foi sen tempo! Hai xa algúns anos que decidimos concentrar os nosos esforzos na construcción dunha embarcación emblemática, do noso "buque insignia" por dicilo dalgunha maneira; que nos permitira ademáis afrontar navegacións máis longas, e poder levar xente a bordo. As nosas dorniñas de nove cuartas, ideais para regatear, quedan pequenas para facer de escola, para difundir os valores patrimonias, para darlle a coñecer á xente a beleza desta navegación.... é por fin ahí está :os esforzos deron seu froito e, precisamente agora, podemos botar a andar, e de paso aportar o noso gran de area ao mantemento da carga de traballo desta carpinería tradicional, da carpinteiría de riveira tradicional.
Mirade para a proa: é tan alta como min! É unha dorna xeiteira de 6,50 metros de eslora, creo que corresponde a trece cuartas e media, a máis grande que fará Domingos dentro da peza principal do seu obradoiro: terémola que botar a unha banda para sacala pola porta; e unha peculiariedade: vai cravada con cravos, con cravos de verdade de ferreiro, forxados especialmente para ela en aliaxe doce, para gatealos ben e que aguanten ben anos. Galvanizounos artesanalmente Adelino . Había algúns anos que non se construía unha dorna con cravos de verdade.  Ahí tedes o barragán, que recibirá todas as táboas na popa, e a Domingos, que quitou os lentes para a foto:

Se o inverno respeita a saude de Domingos e o mar non fai ningún estrago relevante na flota pesqueira tradicional de Aguiño e arredores que reclame a atención do noso carpinteiro, esperamos tela feita en tres meses. Logo a trataremos como corresponde: con alquitrán de brea de piñeiro navegará un ano para que cure ben a madeira... 
Parabéns a todos os membros do Lajareu por esta boa nova, e a todos os que se alegran pola incorporación dunha dorna xeiteira máis á flota das embarcacións tradicionáis de Galiza.

Unha aperta
Suso

10/09/2012

CRÓNICA DA REGATA DE SANTA UXIA 2012


A manhã de calma podre e borraxeira mesta pom em questiom a viabilidade da regata. Finalmente fai-se possível ao levantar a névoa com um ventinho do Oeste que entrou co cambio da maré.

Linha de saída na praia de Coroso. Engalanam a ria 18 dornas de nove quartas de quilha coas suas velas de relinga sobre un horizonte de brêtema. Hoje toca pormos os paus em candela. Para a saída, umha boia de desmarque e a bolinar na procura do primeiro passo polo vermelho do porto de Ribeira, o Lajareu, que dá ademais nome ao nosso clube.

Nesta curta saída cara ao vento decidiuse o grupo de cabeça para o resto da regata. Foi o primeiro capítulo de estratégia. As dornas que procurarom o vento cara a ria salvarom ligeiras o Lajareu e acadarom postos relevantes que já nom perderiam. As que forom a terra ficarom arrombadas na encalmada, para sairem paseninho e com dificuldade.

Das melhores tripulaçons da ría de Arousa claramente no grupo de cabeça: A Faisca e a Rona do Grove, a Bazarra e a Jalerna da Ilha da Arousa afinando duramente, e a Sandra e a Ardentía do Lajareu em mui boas posiçons.

Co ventinho WSW pola rabeira da banda de meo desfila a flotilha em ringleira já formada cara o sinal do Camouco, passo obrigatório antes de fazer a volta na Ilha dos Ratos. Poucas novidades nestes bordos, primeiro de popa, para fazerem logo um cómodo través de couso. Ainda assi, os patrons concentram-se na procura do ponto ótimo de escota cos tripulantes à tosta afinando com jeito as varas de portar para adiantar algúm posto.


PRIMEIRO PASSO POLOS RATOS

Vira-se a Ilha dos Ratos cos olhos atentos ao passo entre os conles de Riazor, aos que segue de novo outra etapa decisiva para a regata: a bolina cara o Lajareu para completar o primeiro triângulo.

De novo a escolha correta é decisiva. É o caso da Ardentía de Ribeira, que decide procurar o vento afastando da terra e logra passar em cabeça o sinal vermelho do Lajareu. Outras dornas que optarom polo bordo de terra aminoram contra o dique do porto costando-lhes trabalho remontar o sinal e perdendo de novo possiçons.

O vento mantem-se. Nom é muito, mas é limpo, rolando ligeiramente cara W puro e definindo-se cada vez mais en intensidade, o que dá pé à segunda volta.


MOVEMENTOS NOS BORDOS FINAIS

No segundo passo polos Ratos vai a Rona de primeira, perdendo esta possiçom por umha virada antes de tempo que obriga a retificar mais adiante cunha nova virada. Detrás dela vai também a Faisca, seguida da Sandra, a Ardentía e a Jalerna, todas à procura do vento longe de terra.

A Ardentía adianta várias dornas até a primeira possiçom graças a umha bolina mui fina até aproximar a linha de chegada onde perde vento perto de terra, e deixa passo à Sandra, que adiantara também um par de postos e termina por coroar a regata governada por José Antonio Castrelo -O Panadeiro- à canha, e Antonio Santiago -Panarro, à tosta. Parabéns aos palmeirans da Sandra polo primeiro posto!

A Jalerna entra de terceira, fazendo umha mui boa regata e sabendo aproveitar bem esse último e decisivo “bordo por fora”. Prémios também para a Rona e a Faisca que entram finalmente em quarto e quinto postos, respetivamente.

Trás delas, completa-se a tabela com dornas das associaçons Dorna da Ilha da Arousa, da Dorna Meca do Grove, da Fasquía da Ilha da Arousa, da Rabandeira de Vilanova e do Lajareu de Ribeira. 

A todos os clubes de fora de Ribeira agradece-se-lhes a participaçom, e a afoutada decisom para atravessarem a ria à manhã com as pobres perspetivas meteorológicas que havia.



TABELA CLASSIFICATÓRIA - SANTA UGIA 2012

1
Sandra Lajareu por Barlovento Ribeira
2
Ardentía Lajareu por Barlovento Ribeira
3
Jalerna Dorna Ilha da Arousa
4
Rona Amigos Dorna Meca O Grove
5
Faisca Amigos Dorna Meca O Grove
6
Bazarra Dorna Ilha da Arousa
7
Petela Fasquía Ilha da Arousa
8
Cachi Lajareu por Barlovento Ribeira
9
Zoa Lajareu por Barlovento Ribeira
10
Xaimiña Lajareu por Barlovento Ribeira
11
Mariestela Rabandeira Vilanova
12
Treboada Dorna Ilha da Arousa
13
Papoula Lajareu por Barlovento Ribeira
14
Rabuda II Lajareu por Barlovento Ribeira
15
Fiuza Lajareu por Barlovento Ribeira
16
Volandeira Lajareu por Barlovento Ribeira
17
Praia das Carolinas Lajareu por Barlovento Ribeira
18
Moura Lajareu por Barlovento Ribeira

06/09/2012

REGATA DE SANTA UXÍA 2012

Olá a todo o coletivo dorneiro, este sábado 8 de setembro celebramos a segunda regata do verão do Lajareu: a regata de Santa Ugia 2012.

Vai abaixo, como sempre, o anúncio oficial da regata, e como não, o convite expresso a todos os clubes para se animarem a participar. De momento os partes falam dum ventinho ligeiro bom para umha regata mui participativa e tripulações que aproveitam bem o vento. Como seja, o importante é navegar, desfrutar do mar e do convivio, e que haja dornas a bolinar na ria.


01/08/2012

A REGATA DO CARME (OU DA DORNA) SERÁ O 18 DE AGOSTO




Hola a todos:

Xa temos data para a Regata do Carme (Regata da Dorna): será o sábado 18 de agosto e daremos as pitadas de saída ás 16:00.
Un ano máis porase en xogo a Dorna de Prata e semella que os amigos do Grove teñen gaña de levala.

Tal como xa vos anunciabamos, o aplazamento da regata tivo causa na iniciativa do Concello de promovela e pontenciala.

Facémola coincidir coa mariñeira "Feira Artemar", e contará cun maior apoio do Concello, que a integrará como acto deportivo central dese evento. Así que esperamos ofrecer aos participantes algo máis de festiña ao remate que o habitual.

Tamén pretendemos achegar a regata ao pobo, o que procuraremos deseñando un percorrido que concilie as esixencias meteorolóxicas e deportivas coa posibilidade de que, alomenos a saída e chegada, podan ser contempladas polo público.

En breve publicaremos a convocatoria de regata; mentres tanto, aí queda unha foto da Moura avarada no Bao como unha dorna máis dos amigos da Illa na depóis da recente Volta á Arousa.

Poi eso: regata e festa o 18 de agosto en Riveira.

Unha aperta

26/07/2012

APLAZADA A REGATA DO CARME (REGATA DA DORNA)

Hola a todos:
A Xunta Directiva ven de tomar a decisión de aplazar a Regata do Carme, tamén coñecida como Regata da Dorna, ate unha data ainda por determinar a meidados de agosto.
O motivo ten que ver con interese do Concello, titular do trofeo Dorna de Plata, en potenciar e promover este acontecemento deportivo.
Axiña estaremos en condicións de comunicar a nova data e explicarvos polo miudo as circunstancias que xustifican este cambio.
Entre tanto, por favor, facede o posible por difundir esta nova entre os participantes habituáis.
 


Unha aperta
Suso
 

10/06/2012

Rematou a regata de Primavera 2012


A dorna Lusiña, de Antonio e Ron, vencedora desta edición.

Hai uns sábados disputamos a cuarta proba coa que remata a Regata de Primavera deste ano.
O dia estivo estupendo para saír a navegar aínda que a predición de forza catro era un pouco escasa e foi preciso que o Comité de Regata obrigase a coser un rizo para facer a proba.
O vento estaba de suroeste e a marea subía así que se xuntaban para formar algo de onda, alá no Camouco andaba cerca do metro entre o seno e a cresta.
O percorrido foi un triangulo Coroso – Lajareu – Camouco – Coroso, todo por babor, e meta no Lajareu, que permitiu todas as posicións da vela. A saída da praia era unha bolina dende a praia proa ao Lajareu polo que non fixo falta a boia de desmarque. Na saída a lancha do xuíz estaba preto da Illa dos Ratos e as dornas arrancaron maioritariamente cara a praia, as únicas que fixeron o primeiro bordo cara fora foron a Moura e a Áncora no que parecía o lado malo pero nesa bordada rolou o vento o suficiente cara o seu lado como para que se visen favorecidas e chegasen ata o Lajareu xunto co resto das dornas.
De alí navegamos a un largo ata o Camouco onde na virada pola popa a vara de portar da Moura foi ao mar e tivemos que baixar vela ata que os rapaces da Cruz Vermella nola recolleron, do sexto posto pasamos ao último, que remedio.
De alí ata a baliza da praia de Coroso o vento entraba pola aleta de babor e as dornas planeaban sobre as ondas polo que resultou un bordo moi rápido e algo comprometido polas orzadas que nos provocaban.
No momento en que andaban as dornas na baliza de Coroso o vento subiu un pouco de intensidade aínda que por pouquiño tempo. Nesta última bolina proa ao sinal do Lajareu a Rabuda deu quilla arriba pero non lles sucedeu nada, a lancha de apoio botoulles unha man e logo xa eles remataron de achicar e voltar para terra.
A proba rematou do seguinte xeito:
1) Volandeira, 2) Xaimiña, 3) Lusiña, 4) A Fiuza, 5) Ardentía, 6) Cachi, 7) Sandra, 8) Papoula, 9) Moura. Non finalizaron a Rabuda e a Áncora.

E a clasificación xeral así:

Hai que felicitar aos gañadores Antonio e Ron, que conseguiron o seu primeiro campionato. A Lusiña ano a ano foi subindo postos nas clasificacións finais das nosas regatas ata que nesta acadou o primeiro posto. É xa unha habitual nos trofeos pero agora tócalle manter a posición.



Empatados a puntos na clasificación final pero con peor resultado nesta última proba quedou en segundo lugar a Sandra de José Antonio e Nacho.



Este ano hai que destacar tamén o patrón revelación, o Xaime (fillo), que desde que está a participar nas regatas non baixa dos primeiros postos. Hai que supoñer que a experiencia do seu pai, o Xaime, ten algo que ver tamén pero o que está claro é que desde que mudou a configuración na dorna Xaimiña, se converteu nunha dorna a bater.









No cuarto lugar un premio á regularidade da Cachi, con Juan e Jesús, sempre rondando os postos de cabeza.
















E no quinto posto da xeral a dorna que gañou esta última proba, a Volandeira do patrón Víctor, que se achega tódolos sábados dende Vigo, e a súa tripulante Ana que tamén pertence á A.C. Remadoira. O seu compañeiro habitual Brux anda lesionado no hombreiro polo que esperamos que se poña ben canto antes.






Agora esperannos as regatas do verán, a proxima cita é a Volta a Illa, así que por alí nos veremos.

28/05/2012

http://a5.sphotos.ak.fbcdn.net/hphotos-ak-prn1/525932_341112902623737_2119629195_n.jpg

Un pouquiño de bo humor, que falta fai...

14/05/2012

A terceira proba rematou en encalmada

A terceira proba da regata de primavera 2012 comezou preciosa, coa saída en Coroso e unha boia de desmarque nas Miñoteiras. Como viña un lestiño-nordés había que bolinar para chegar ao desmarque: uns fomos para Coroso apurando o bordo ate a mesma area e outros sairon para fora, o encontro das duas frotiñas cruzándose na mesma boia de desmarque foi un espectáculo. Dalí había que navegar de aleta proa ás Eiroas, pero nesas empezou a caer o vento e caeu e caeu... Quedamos alí andando uns centímetros por minuto a tarde toda. Había nubes altas no ceo, pero quentaba... Victor e Santi aproveitaron para darse un baño, incluso. Xa un non sabía de onde viña o vento. Veña cambiar vela, veña quitar e poñer vara... Ata que a cousa non se tivo en pe e o xuiz pitou a fin da proba.
A partir de ahí: unha festa, uns volveron remolcados e outros fomos a bogar.


A Praia das Carolinas a bogar logo dunha regata deste de inverno.

08/05/2012

2ª MANGA DO XVI CAMPEONATO DE PRIMAVERA DE DORNAS A VELA


A Xaimiña, da Pobra, dominou case toda a regata. A Áncora, xusta vencedora.

Às 16,30 horas do pasado sábado 28 de abril dábase a saída desta nova manga, na que teríamos uns protagonistas moi especiais Xaime, pai e fillo, este último como novo patrón desta dorna lendaria, e que desde que comezou  no pasado campionato de este ano, está a facer un papel  digno de salientar,e co que haberá que contar para as próximas edicións, xa que está a demostrar unha regularidade sobresaínte.

Aparellando as dornas antes da regata
Nesta ocasión o vento, de entre 10 e 14 nós, sopraría de forma regular durante toda a xornada, tarde esta moi agradable se non fose polo fortísimo chubasco que entraría a última hora, ao que acompañaban refachos de máis de trinta nós, e obrigaría, por precaución, a abandonar e ser remolcadas pola lancha de salvamento marítimo aquelas dornas que aínda non chegaran a meta.

Na saída, do medio da rada, as embarcacións debían deixar por estribor a boia de desmarque, situada preto da praia.  Neste primeiro treito sería a Xaimiña a que pasaría de primeira, e seguida moi de perto pola Lusiña, e pola Rabuda.
Ata o seguinte paso, Illa de Rúa, e despois dunha empopada moi pechada, non habería mudanzas na clasificación dos primeiros postos.
De aquí sería a Áncora a tomar a posición de cabeza, debido en parte á saída do temón que sufriu a Xaimiña despois de tocar nunha pedra, aínda que este percance non seria suficiente para facerlle perder os postos de cabeza facendo unha excelente segunda posición.
Os veteranos mariñeiros, Adelino e Agustín da Ancora, serían os que  acabarían primeiros, despois de facer unha navegación perfecta, sen abrirse moito cara a praia da Corna como farían a Fiuza ou a Cachi, nin tampouco irían cara as Airoas como farían a Tixosa, Rabuda, Praia das Carolinas ou a Volandeira. Esta decisión de ir polo medio sen alargar moito os bordos, demostraría ao final ser o acertado, xa que o vento estaba xusto de proa, dende Rúa ata a liña de meta.
A Vikinga, gañadora da última proba da regata de inverno, con Fernando á caña e os novos navegantes do Lajareu, Carmen e Carlos. Non hai como empezar gañando para collerlle o gusto.

Destacar o traballo feito polos tripulantes da Tixosa, os únicos que elixiron o bordo ata as Airoas, acadando ao final a terceira posición. A Fiuza tivo que sufrir no seu último treito, os fortes refachos de mais de trinta nós. Severino e Carlos farían, do porto da Insuela ata a meta, unha empopada vertixinosa. Esta dorna sería a última en poder chegar a meta polos seus propios medios.

A clasificación desta manga:
1-Áncora
2-Xaimiña
3-Tixosa
4-Sandra
5-Cachi
6-Rabuda II
7-Lusiña
8-A Fiuza
Dornas que non finalizaron:
-Vikinga
-Praia da Carolinas
-Ardentía
-Volandeira



21/04/2012

Comezou a regata de primavera 2012


Ventos moi fortes e moito frío durante toda a xornada. 

A Sandra, de Palmeira, xusta vencedora.

O pasado sábado 14 dábase a saída a un novo campionato dende a praia de Coroso.
So facía 15 días que a “Sandra”, de Antonio e Ignacio, remataban unha sensacional segunda posición no campionato de inverno, pero a estes dous veteranos regatistas parece que lles está gustando estar nos postos de cabeza. Aquí están as fotos.


Ás 16:30 horas daríase a saída entre a illa dos Ratos e o sinal do Camouco en dirección a praia de Coroso, onde estaba situada a boia de desmarque, primeiro paso obrigado.
Dende a pitada da saída o protagonista de toda a xornada sería sen ningunha dúbida o forte vento, que sopraría con moita intensidade e obrigaría a comisión de regata a impoñer para todos os participantes un rizo.


Nos instantes previos da saída, e sentindo como o vento ia a máis por momentos, todas as embarcacións decidirían poñer dous rizos, por precaución, todas menos a “Sandra” e a “Lusiña,” que decidirían saír soamente cun rizo, decisión esta que lles valería, xunto co bo facer destes experimentados mariñeiros, rematar a regata en primeira e segunda posición respectivamente.


A primeira en pasar pola boia da praia sería a “Lusiña”, aínda que despois de avisarlles que a viraran no sentido contrario, e tendo que rectificar a manobra, pasaría a Sandra de primeira, seguida de cerca pola Volandeira e un pouquiño máis retrasada a Vikinga e a Lusiña. 




Dende aquí as embarcacións deberían de continuar paralelos a praia e co vento pola aleta de babor ata a Illa dos Ratos, onde se manterían as mesmas posicións que no paso pola primeira boia.


O seguinte tramo sería ata a boia situada preto do Camouco. Neste treito os regatistas tiveron que empregarse a fondo. Unha bolina moi bonita e disputada, debido a que as catro primeiras dornas ían aliñadas e algunha a menos de cinco metros da outra.

 

Dende este último paso, só quedaría remontar a boia onde estaba situada a meta, moi preto da praia, e como o vento cadraba xusto na proa, dúas dornas, a Lusiña e a Volandeira decidiron o bordo proa o porto e a Sandra e Vikinga virarían proa á praia. Un pouquiño máis atrás viñan a Cachi e a Rabuda, tratando de acercarse ao grupo de cabeza.


Debido a un forte chuvasco que entraba polo norte da ría, sairía beneficiada a Sandra, que entraría no primeiro posto e seguida a moi pouquiña distancia a Lusiña e a Volandeira.

A Xaimiña e a Moura decidiron abandonar logo da saída por diferentes problemas causados polas fortes rachas de vento así que a clasificación quedou da seguinte maneira:

1- Sandra
2- Lusiña
3- Volandeira
4- Vikinga
5- Cachi
6- Rabuda II
Non remataron: Xaimiña e Moura


E non esquecemos aos nosos acompañantes, que sempre están aí, pasan frio coma nós e case nunca saen nas fotos.

Jose María, o noso xuiz de regata habitual


Os rapaces da Cruz Vermella

José no seu barco, acompañado de Charly. E como non, o autor das fotos, Juan, que como é habitual cos reporteiros, non hai unha foto súa. 


Graciñas a todos.

10/04/2012

Remata a Regata de Inverno e comeza a Regata de Primavera 2012

Finalizou a Regata de inverno 2012 cun total de 15 dornas participantes. Na última proba tivemos un vento moi cambiante, empezou cuns 15 nus na saida da praia de Coroso e acabamos con momentos de calma chicha ao caer a tardiña. Aínda así estivo emocionante a liña de chegada porque se decidiron todos os postos, ninguen tiña asegurado o trofeo. Aquí vos deixo a clasificación da regata de inverno 2012 e as fotos da entrega de premios.





Adelino e Agustín da Áncora.















José Antonio e Nacho da Sandra.

















Antonio e Ron da Lusiña













Xaime e Xaime, García e García da Xaimiña. Vaia patrón que apareceu nesta dorna.









Severino e Nacho da Fiuza




















Para o sabado próximo, 14 de abril, comeza a Regata de Primavera polo que publicamos o Anuncio de Regata habitual.



Un saúdo
Marcos

25/03/2012

A piques de rematar a Regata de Inverno 2012

No Lajareu levamos disputadas tres probas da Regata de Inverno 2012. Podedes ver as fotos destes dias no sitio habitual, 1ª proba e 2ª proba. Soamente falta a derradeira proba das catro que a compoñen polo que esperamos que o sabado 31 faga un ventiño bo para disfrutala.

A clasificación está ainda no aire e o resultado desta proba será decisivo, polo primeiro posto pelexan a Áncora e a Lusiña e para os seguintes postos hay moitos candidatos.


Tamén se achegaron os amigos do Grove coa Faisca e A Rona a navegar con nos.


Parece que lles gusta afinar para deixar o Lajareu por babor.

 

Esperamos vervos este sábado tamén para ver como remata todo isto.

17/02/2012

Inicio das regatas no Lajareu. Regata de Inverno 2012.



Boas a todos, logo de estar un bo tempo sen pasar por aquí empezamos o ano con forza programando a habitual Regata de Inverno. Como estes últimos anos, publicamos o Anuncio de Regata para darlle ao evento a formalidade e a publicidade que se merece.
Empezamos xa este sabado 18 cunha prevision de tempo entre nordes e norte con forza 2-3, ceo despexado e unha temperatura entre 10 e 15 ºC.





Bo vento para todos neste ano.